ZORAM TODAY| Aizawl 27th May, 2024 (Mon): Mizoram sorkar  hnuaia hnathawk Under Secretary chin chunglam te'n Secretariat a an awm chhungin Household (MR) peon an chhawr thei a. Under Secretary chin chung sorkar hnathawkte bakah mipui thlan MLA leh Minister, Chief Minister te'n household(MR) peon-a an chhawr zawng zawngte belhkhawm RTI Act hmanga zawhna chhanna a lan danin April, 2024 thleng khan household peon mi 198 sorkarin a chhawr mek.

Heng MR te hi a chhawrtu tur te'n an duh zawng leh tha an tih an chhawr mai thin niin a lang a, thenkhat chuan an chhung hnaivai deuhte bakah tlema khawsak harsa deuhte pawh an chhawr niin a lang. 

Household (MR) te nikhat hlawh hi ₹.420/- niin kumkhat ah mi pakhatin ₹.153,300/- an hlawh a, sorkarin a chhawr zawng zawng mi 198 te tana kumkhata sorkarin sum a sen ral zat tur chu ₹. 3,03,53,400/- a ni.